രാത്രിയില്‍ വേണ്ടത്ര സമയം കിടക്കയില്‍ ചെലവഴിച്ചാലും രാവിലെ ക്ഷീണം തോന്നുകയും പകല്‍ ഉറക്കച്ചടവ് അനുഭവപ്പെടുകയും ചെയ്യുന്നുണ്ടെങ്കില്‍ അത് ഏതെങ്കിലും നിദ്രാരോഗത്തിന്റെ (Sleep disorder) സൂചനയാവാം. നമുക്ക് ആവശ്യമുള്ളത്ര ഉറക്കം കിട്ടുന്നുണ്ടോ എന്നും ഏതെങ്കിലും നിദ്രാരോഗങ്ങളുടെ ലക്ഷണങ്ങളുണ്ടോ എന്നും കണ്ടുപിടിക്കാനുള്ള ലളിതമായ ഒരു ഉപാധിയാണ് സ്ലീപ്പ് ഡയറി.

ജീവന്റെ നിലനില്‍പ്പിന് ഭക്ഷണം പോലെത്തന്നെ അനിവാര്യമാണ് ഉറക്കവും എന്ന് പഠനങ്ങള്‍ തെളിയിച്ചിട്ടുണ്ട്. ഉദാഹരണത്തിന്, രണ്ടുമൂന്നുവര്‍ഷങ്ങള്‍ ജീവിച്ചിരിക്കാറുള്ള എലികളുടെ ഉറക്കം പരീക്ഷണശാലകളില്‍ തടസ്സപ്പെടുത്തിയപ്പോള്‍ അവ രണ്ടുമൂന്ന് ആഴ്ചകള്‍ക്കുള്ളില്‍ മരിച്ചുപോയതായി ഒരു പഠനം സൂചിപ്പിക്കുന്നു.